Sjaldséð mistök hjá Vermaelen og þreytan farin að segja til sín

Mikið leikjaálag virðist vera segja til sín miðað við leikinn í gær og má búast við miklum breytingum í byrjunarliðinu gegn Manchester City næsta þriðjudag. Það var kjörið tækifæri að saxa aðeins á forskot efstu liðanna sérstaklega þar sem að Man Utd. og Newcastle gerðu jafntefli í kolvitlausum leik í gær. 

Andstæðingarnir í gær voru Fulham sem hafa átt ansi erfitt uppdráttar á þessu tímabili þrátt fyrir ágætis leikmannahóp. Maður gerði því kröfu um sigur á heimavelli en allt kom fyrir ekki og jafntefli niðurstaðan eftir að Vermaelen hafði skorað í sitthvort markið í seinni hálfleik.

Það er ekki hægt að segja að leikmenn hafi verið frískir í gær nema kannski Theo Walcott sem var maður leiksins að mati Nallarans. Andrey Arshavin byrjaði í gær á kostnað Gervinho og miðað við spilamennsku hans í gær virðist hann vera búinn á því. Það hefði alveg mátt hvíla Aaron Ramsey og fleiri í liðinu en breiddin er líklega ekki nógu góð í herbúðum Arsenal akkúrat núna sem er mikið áhyggjuefni. 

Góðu fréttirnar eru kannski þær að Abou Diaby er að snúa aftur eftir meiðsli en það er líklega ekki spurning um hvort heldur hvenær hann meiðist að nýju. Jack Wilshere verður ekki klár fyrr en á næsta ári svo miðjan er ansi veik þessa stundina (ef einhver meiðist). Að mínu mati hefði alveg mátt sleppa því að lána Henri Lansbury til West Ham enda alveg hægt að nota drenginn í leikjum sem þessum. Ég meina Liverpool er að nota Jordan Henderson og mér sýnist hann ekki vera mörgum klössum fyrir ofan Lansbury.

Í janúar þyrfti helst að losa sig við farþega í liðinu eins og Chamack, Arshavin og Squillaci og versla inn í staðinn. Hvaða leikmenn er erfitt að segja en allavega leikmenn með gæði.

En það eru nokkrir leikir sem þarf að huga að áður og nú næst er það seðlaveldið frá Manchester. Reikna má með að Samir Nasri verði í hóp hjá City og verður gaman að fylgjast með kauða á gamla heimavelli sínum. Wenger ætlar að halda uppteknum hætti með blöndu af reynslu og kjúklingum. 

Vonum að byrjunarliðsmennirnir hvílist vel um helgina svo við getum haldið áfram góðu gengi.

Að lokum vil ég minnast á andlát Gary Speed en hann fannst látinn á heimili sínu í nótt en hann svipti sig víst lífi. Þar með hefur Aaron Ramsey misst landsliðsþjálfara sinn en landslið Wales var og er orðið helvíti sprækt. 

Gary Speed í baráttunni gegn Arsenal fyrir mörgum árum. Parlour,
Petit og Dixon að ég held þarna á bakvið.

W.B.A. engin fyrirstaða í þetta skiptið

Arsenal fékk aðeins eitt stig úr viðureignum sínum við W.B.A. í fyrra. West Brom vann þá óvæntan 2-3 sigur á Emirates en Nallarinn var þá að fagna Íslandsmeistaratitli Breiðabliks svo að tapið var ekki eins sárt. Aðeins tveir leikmenn úr þeim leik voru í byrjunarliði Arsenal í gær, þeir Alex Song og Laurent Koscielny. Liðið hefur breyst mikið síðan þá og að mínu mati til batnaðar.

Nallarinn var sáttur við að sjá Per Mertesacker á bekknum en Arsene Wenger sagði í viðtölum í gær að hann hafi búist við Peter Odemwingie í byrjunarliði W.B.A. og því hafi hann valið fljóta miðverði. Shane Long var einnig fjarverandi en hann hefur verið að stríða stóru liðunum á leiktíðinni.

Robin van Persie kom engum á óvart og skoraði fyrsta mark leiksins á 22. mínútu er hann hirti frákastið af skoti Theo Walcott. Hann lagði svo upp fyrsta mark Thomas Vermaelen í næstum tvö ár og var virkilega ánægjulegt að sjá þessa tvo pósta saman í byrjunarliði.

Staðan því 2-0 í hálfleik og engin hætta á ferðum.

Aaron Ramsey, Alex Song og Thomas Vermaelen voru allir nálægt því að skora í seinni hálfleik en það var Mikel Arteta sem sá um að klára leikinn endanlega fyrir Arsenal eftir frábært spil.

Góð þrjú stig og mörk sem komu markatölunni loksins í plús á töflunni.

Maður leiksins: Robin van Persie

Úr slást..

í ást :*

Ar53nal hirti öll stigin á Stamford Bridge í snargeðveikum leik!

Nallarinn hefur sjaldan orðið vitni að eins geðveikum leik og hann sá í gær. Fyrirfram mátti reyndar búast við hörkuleik en kannski ekki átta marka dramatík.

Það er kannski óþarfi að renna yfir öll atriði leiksins enda vænti ég þess að stuðningsmenn séu búnir að gera lítið annað síðasta sólarhring en að horfa á endursýningar af leiknum. Því ætla ég aðeins að renna létt yfir svona það helsta sem vakti athygli mína.

Samba Santos í ruglinu

Mikið var rætt um það á Nallara spjallinu hvernig vörnin ætti að líta út þar sem að Thomas Vermaelen var orðinn frískur. Hún hélst óbreytt en Nallarinn hefði viljað sjá Santos út og Vermaelen inn. Staðan hefði jafnvel litið öðruvísi út hefði sú breyting orðið að veruleika því að það má alveg skrifa tvö mörk á Santos.

Hann klikkaði illa á dekkningunni á Juan Mata í fyrsta marki leiksins og því miður var fótavinna Mertesacker það léleg að sendingin frá Mata skóp mark fyrir Chelsea. Í stöðunni 2-3 gaf hann svo boltann beint á Chelsea leikmann og upp úr því náðu þeir bláu að jafna. Það má þó spurja sig hvað Szczesny var að drífa sig í að koma boltanum í leik og einnig hvort að Lukaku hafi svo brotið á Santos í þeirri sókn.

Per Mertesucker

Santos var þó ekki eini varnarmaðurinn sem leit illa út því að Mertesacker átti heldur ekki góðan dag og eiginlega verri þar sem Santos jafnaði allavega leikinn. Fyrir utan mistökin sem hann gerði í fyrsta markinu þá klúðraði hann aftur er hann missti John Terry fram úr sér sem kom Chelsea aftur yfir. Enn og aftur var fótavinnan léleg og því miður fyrir hann þá var Joachim Löw staddur á leiknum og hefur kauði líklega ekki verið sáttur með það sem hann sá. Mikel Arteta hefði einnig mátt dekka stöngina sína betur en þá hefði staðan líklega verið 1-1 í hálfleik.  

Thierry Walcott?

Arsenal kom þó til baka þökk sé mörkum frá Santos og Walcott. Theo Walcott var frábær í leiknum og hreinlega lék sér að Ashley Cole. Það er hinsvegar ekki nóg að standa sig vel í einum leik og því þarf Walcott nauðsynlega að finna stöðugleika í sínum leik. Spili hann alltaf svona þá erum við í fjandi góðum málum fram á við með hann, Gervinho og v. Persie.

Rautt á Szczesny?

Í stöðunni 2-2 óð Szczesny út úr teignum er Ashley Cole var kominn í hættulega stöðu. Szczesny straujaði fyrrverandi Arsenal manninn niður og fékk gult spjald fyrir vikið en margir hefðu viljað sjá rautt. Hinsvegar voru Mertesacker og Koscielny komnir inní teig svo hann var ekki síðasti maðurinn. Heppnin svo sannarlega með Arsenal þarna.

Sjóðheitur Persie!

Er Chelsea jafnaði leikinn í 3-3 varð Nallarinn stressaður. Ætlaði Arsenal að tapa enn einum leiknum? Ekki að þessu sinni nei. Því að í okkar röðum er maður að nafni Robin v. Persie. Það er líklega enginn heitari í knattspyrnuheiminum í dag fyrir framan markið. Þrátt fyrir að John Terry hafi dottið í fjórða markinu þá var enn verk að vinna í að koma boltanum framhjá Cech. Það þarf mann með gæði til þess að tækla svoleiðis stöðu vel og það gerði Persie að sjálfsögðu.

Hann var þó ekki saddur og tryggði sér boltann eftir leik með glæsilegu banana skoti sem Cech átti engan séns í. Lokastaðan 3-5 í trylltum leik og fögnuðu Arsenal leikmenn þessum þremur stigum eins og þeir hefðu unnið deildina í lokin. Sjálfstraustið er komið en þó er enn pláss fyrir framfarir í vörninni. 

Næst er ekki síður mikilvægur leikur gegn Marseille á Emirates á þriðjudaginn og 1. sætið í riðlinum nokkuð tryggt vinni Arsenal þann leik.  

Maður leiksins: Robin van Persie

Gervinho & Persie sáu um Stoke

Arsenal hélt áfram góðu gengi sínu í dag með 3-1 heimasigri á Stoke City. Það vakti athygli að Markaþurrð Chamakh byrjaði leikinn á meðan að Persie hvíldi á bekknum. 

Gervinho kom Arsenal yfir á 27. mínútu eftir glæsilegan undirbúning frá Aaron Ramsey. Rambo vippaði þá boltanum yfir vörn Stoke beint á kassann á Gervinho sem lagði hann fyrir sig og skoraði. Glæsilegt mark og menn segja að Barcelona hafi reynt að skora svona mark án árangurs.  

Á meðan að Nallarinn skellti sér á barinn tók Stoke sig til og jafnaði leikinn eftir vafasaman aukaspyrnudóm á Koscielny. Stoke komu Arsenal á óvart með vel útfærðri aukaspyrnu en það var Peter Crouch sem sá um að skora. Virkilega pirrandi og sérstaklega þegar að manni fannst Koscielny ekki vera brotlegur.

Lítið markvert gerðist eftir jöfnunarmarkið og var staðan 1-1 er Lee Mason flautaði til hálfleiks.

Seinni hálfleikur fór rólega af stað og ekki leið á löngu þar til að áhorfendur voru farnir að kalla nafn fyrirliðans, Robin van Persie. Áhorfendur fengu ósk sína uppfyllta á 66. mínútu og lifnaði leikur Arsenal-manna strax við í kjölfarið.

Það tók fyrirliðann ekki nema sjö mínútur að koma sér á blað en hann getur þakkað hinum vel greidda Gervinho fyrir það sem og kannski Asmir Begovic líka. Gervinho óð þá inn í teig af hægri kanti og kom með góða sendingu inná Persie sem lét vaða á markið. Í fyrstu hélt ég að Begovic hefði varið en boltinn hreinlega lak inní netið og staðan orðin 2-1.

Sömu arkitektarnir voru að verki níu mínútum síðar en þá átti Andrey Arshavin fallega sendingu á Gervinho sem hljóp líkt og antilópa inní teig áður en hann fann v. Persie sem afgreiddi boltann í netið en aftur var Begovic í boltanum og hefði líklega átt að gera betur. 

Lokastaðan 3-1 og hefur nú leyndarmálinu um grunsamlega greiðslu Gervinho verið afhjúpað. Gervinho sagði í viðtali eftir leikinn að hann hafi ákveðið ásamt hárskera sínum að færa kollvikið ofar til að fá minni loftmótstöðu í hlaupum sínum. Hann ákvað því að fórna útlitinu fyrir hraðann og eru stuðningsmenn Arsenal þegar búnir að fyrirgefa honum fyrir greiðsluna ljótu eftir frammistöðuna í dag.

Flestir í Arsenal liðinu áttu góðan dag í dag fyrir utan Marouane Chamakh sem og Theo Walcott enda voru þeir báðir teknir af velli. Hvenær ætlar Wenger að sjá það að Walcott er alls ekki að virka sem hægri kantmaður með sínar ömurlegu fyrirgjafir? Væri ekki réttara að spila honum sem framherja í fjarveru v. Persie í staðinn fyrir t.d. Chamakh sem ætlar greinilega ekki að skora meira á þessu ári? Annars hefur Wenger staðfest það að Park Chu Young fái að byrja gegn Bolton í deildarbikarnum á þriðjudaginn og eru það góðar fréttir.

En allt að þokast í rétta átt hjá Arsenal þessa dagana og nú styttist óðum í varafyrirliðann Thomas Vermaelen og þá er bara spurning hvort að Wenger hendi Mertesacker eða Koscielny út úr liðinu. Persónulega finnst mér að Mertesacker ætti að víkja. 

Annars góð fótboltahelgi að baki þar sem að Manchester United fékk að upplifa svipaða martröð og Arsenal gerði á Old Trafford í ágúst síðastliðnum með sjokkerandi 6-1 tapi fyrir nágrönnunum í City í dag. 

Gervinho fyrir breytingu, hræðilegt að sjá manninn! 

Yngsta mark tímabilsins og hollensk sleggja skiluðu 3 stigum

Enn og aftur getum við þakkað foreldrum Robin van Persie fyrir að koma þessum snillingi í heiminn fyrir sirka 28 árum. Það tók fyrirliðann aðeins 29. sekúndur að brjóta ísinn og er það yngsta mark tímabilsins (enn sem komið er) og jafnframt það fljótasta í Arsenal-sögunni í deildinni. Gervinho lagði þá boltann út á Persie sem gerði vel í að skapa sér pláss áður en hann skaut með hægri framhjá Mignolet í markinu. Draumabyrjun.

Hann var svo óheppinn að koma Arsenal ekki í 2-0 á 12. mínútu þegar hann snéri Kieran Richardson laglega af sér og tjippaði boltanum yfir Mignolet að hætti Dennis Bergkamp en því miður neitaði stöngin honum um mark tímabilsins. 

Sunderland komst loksins inní leikinn á 27. mínútu þegar Szczesny ákvað að kíkja í smá skógarferð og skapa þar af leiðandi stórhættu upp við mark sitt en ræstitæknirinn Alex Song bjargaði orðspori Szczesny í þetta skiptið. Þarna öðluðust leikmenn Sunderland trú á verkefninu og var ekki langt í jöfnunarmarkið eftir þetta.

Eftir nokkurn barning fyrir framan markið hjá Arsenal var loksins dæmd aukaspyrna á Mikel Arteta rétt fyrir utan teiginn og það þýddi aðeins eitt, vandræði. Því að í röðum Sunderland má finna dreng frá Svíþjóð sem ber nafnið Sebastian Larsson en hann kemur einmitt upp úr unglingastarfi Arsenal. Ekki veit ég hvar hann lærði að skjóta (allavega ekki hjá Arsenal) en hann hlýtur að teljast með betri skotmönnum deildarinnar um þessar mundir. Hann átti því ekki í vandræðum með aukaspyrnuna sem Arteta færði honum og smellti honum í skeytin vinstra megin. Í endursýningu má sjá nokkuð skondna sýn þegar að Tomas Rosicky lítur ekki einu sinni til baka eftir boltanum þar sem hann veit 100% hvar hann mun enda.

Sunderland hefði getað komist yfir fimm mínútum seinna þegar að Sessegnon átti sendingu fyrir mark Arsenal þar sem mættur var konungur spjaldanna, Lee Cattermole. Það var bara formsatriði hjá Cattermole að skalla þennan bolta inní markið og var hann meira að segja búinn að skipuleggja fagnið sitt. Wojciech Szczesny eyðilagði hinsvegar sunnudagssteikina hans Cattermole með stórbrotinni markvörslu og kom í veg fyrir niðurlægingu á Emirates.

Rétt áður en flautað var til hálfleiks fékk Jack Colback gott færi til að skora en skaut blessunarlega yfir rammann. Howard Webb flautaði til hálfleiks rétt eftir þetta Arsenal stuðningsmönnum til mikillar ánægju sem púuðu duglega á leikmenn Arsenal í kjölfarið. 

Arsenal mætti sterkari til seinni hálfleiks og stjórnaði leiknum algjörlega án þess þó að skapa sér nein afgerandi færi en þetta er vel þekkt vandamál hjá okkar mönnum.

Föstu leikatriðin fóru öll út um þúfur og það var sama hver reyndi. Heyra mátti Sebastian Larsson skellihlæja að sorglegum tilraunum Arteta, Walcott og Santos.

Andrey Arshavin kom nokkuð ferskur inn í leikinn og var nálægt því að koma Arsenal yfir með glæsilegu einstaklings framtaki þar sem hann lék á hvern Sunderland manninn á fætur öðrum. Táin brást honum þó í skotinu sem fór framhjá. 

Það var svo á 83. mínútu sem að Arsenal nýtti sér loksins fast leikatriði og loksins hélt Sebastian Larsson kjafti. Robin van Persie hefði ekki getað beðið um betri staðsetningu og smellti honum í skeytin nær. Glæsilegt mark hjá Hr. Arsenal!

Leikurinn var þó langt frá því að vera búinn eftir þetta og strax eftir markið kom smá taugaóstyrkur í mannskapinn. Sunderland tókst meira að segja að skora en þökk sé rangstöðureglunni var það dæmt ógilt. Mikilvæg þrjú stig því staðreynd sem fleytti Arsenal alla leið uppí 10. sæti. 

Nallarinn var sérstaklega ánægður með frammistöðu Tomas Rosicky í leiknum sem og Carl Jenkinson sem stóð sig vel í fjarveru Bacary Sagna. Robin van Persie var þó langbesti maður vallarins í dag og ljóst að án hans væri Arsenal aðeins miðlungs lið í deildinni.

ML: Robin van Persie 

 
Fyrirliðinn sáttur við gang mála!

Hundraðasta markið kom gegn Bolton

Maður gat loksins brosað í leikslok er Arsenal vann Bolton 3-0 á Emirates leikvanginum sem hefur oft verið þéttari setinn.

Fyrri hálfleikurinn var reyndar ekkert sérstaklega spennandi. Arsenal stjórnaði ferðinni án þess að skapa sér neitt af viti. Darren Pratley kom Bolton reyndar næstum yfir með skemmtilegri tilraun eftir aukaspyrnu en Szczesny sá sem betur fer við kauða. Van Persie átti svo flotta aukaspyrnu stuttu síðar en hann þurfti að bíða aðeins lengur eftir sínu 99 marki fyrir félagið. Gervinho átti svo síðasta færi fyrri hálfleiks með hörkuskoti fyrir utan teig. Enginn hefur andað léttar en Grétar við að sjá boltann fara uppí stúku enda hafði hinn hárfagri farið illa með siglfirðinginn í aðdraganda færisins.

Eitthvað hefur hálfleiksræða Wengers kveikt í mannskapnum því að seinni hálfleikurinn var nýfarinn af stað þegar Robin van Persie kom Arsenal yfir. Gervinho hélt uppteknum hætti og gerði lítið úr Grétari með laglegum snúning en féll til jarðar í sömu andrá eftir tæklingu Grétars. Mark Clattenburg sem átti flottan leik lét leikinn halda áfram þar sem Ramsey náði boltanum strax og skilaði honum svo til Persie sem gerði virkilega vel áður en hann setti boltann í netið.

David Wheater var svo rekinn af velli á 55. mínútu fyrir að toga Walcott niður sem var kominn á harðasprett eins og svo oft áður. Clattenburg var ekki í vafa og sendi Wheater beint í sturtu. Eftir þetta var leikurinn algjörlega í höndum Arsenal og aðeins spurning um hversu stór sigurinn yrði. Jussi Jaaskelainen hélt reyndar markatölunni í lágmarki með afbragðs markvörslum og sá meðal annars við hörkuskoti frá Mikel Arteta. Bolton var reyndar nálægt því að jafna þegar þeir komust í skyndisókn en skot Chris Eagles olli Szczesny engum vandræðum.

Jaaskelainen sem hafði náð að halda Bolton inní leiknum var loksins sigraður en þá skoraði okkar besti leikmaður, Robin van Persie, sitt hundraðasta mark fyrir félagið. Walcott átti þá góðan sprett upp hægri vænginn og gaf boltann fyrir sem endaði í vinstri hælnum á Persie. Snyrtilegt mark í alla staði og Hollendingurinn meiðslahrjáði búinn að brjóta hundrað marka múrinn!

Ekki löngu seinna átti Alex Song glæsilega sendingu sem Paul Robinson náði ekki til og Walcott því allt í einu orðinn einn á móti marki. Walcott fór reyndar illa að ráði sínu og hreinlega ótrúlegt að hann hafi ekki skorað úr svona færi. Svo talar hann ekki um annað en að hann vilji vera fremsti framherjinn í liðinu en hann sýndi það og sannaði í þessu marktækifæri að hann hefur ekkert að gera þangað í bili. Ekki nóg með það þá lét Fabio Capello sig hverfa fljótlega eftir þetta.

Það var svo enginn annar en Alex Song sem veitti Bolton síðasta náðarhöggið í leiknum. Hann fékk þá sendingu frá Bacary Sagna og sýndi nokkuð lipra takta með boltann áður en hann smellti honum í markið. Fullkominn endir á þessum leik þar sem Alex Song, Robin van Persie og Aaron Ramsey áttu virkilega góðan dag. Vörnin hélt einnig hreinu sem var vel þegið enda markatalan ekki sú álitlegasta á töflunni.

Olympiacos kemur svo í heimsókn á miðvikudaginn næsta og setjum við Nallarar kröfu á þrjá punkta í þeim leik til að koma okkur almennilega í gang í þessum riðli.

Maður leiksins: Robin van Persie

Ungur nemur, gamall temur. Nú munar aðeins 20 mörkum á milli þessara meistara! 

Leikmenn Arsenal með fimm kvikindi á Ewood Park

Ykkar einlægi ritari hefði betur sleppt því að keyra til Randeberg (Noregi) í þeim tilgangi að ná seinni hálfleiknum í dag. Ég pantaði mér bjór og um leið og ég settist niður skoraði Alex Song líka þetta ömurlega sjálfsmark. Ekki veit ég hvað gekk á í fyrri hálfleik nema það að Gervinho og Arteta komust á blað sem er afar ánægjulegt. Yakubu átti svo snyrtilegt mark eins og Nígeríumanna er siður.

Spilamennska Arsenal var ekki svipur með sjón í seinni hálfleik og ekki var heppnin heldur á okkar bandi. Yakubu var fyrir það fyrsta rangstæður í sínu öðru marki og í endursýningu má sjá hve illa línuvörðurinn var staddur í því tilfelli. Bacary Sagna vék svo af velli vegna meiðsla fyrir Johan Djourou og þá fór heldur betur hrollur um gamla. Í Football Manager er Johan Djourou til að mynda með eldrauðan hnapp í hægri bakvarðarstöðunni. Lélegur varnarleikur var enn verri við komu hans. Hann náði sér meðal annars í gult spjald, átti eina verstu fyrirgjöf sem menn hafa séð í þessum heimi og hafði svo engan kraft í tæklingu sinni sem uppskar fjórða mark Blackburn.

Það eina jákvæða í þessum leik voru markaskorarar Arsenal. Gervinho skoraði eftir þriggja leikja bann, hinn vel greiddi Arteta skoraði gott mark og Chamakh sjálfur skoraði sitt fyrsta mark í langan tíma eftir glæsilega fyrirgjöf frá v. Persie. Mertesacker hefði svo endilega mátt skalla boltann inn þegar leikurinn var á enda og svo með smá heppni hefði Walcott getað fengið víti í blálokin.

Vandamál varnarinnar heldur því áfram og sakna ég sárlega Thomas Vermaelen en sem betur fer styttist í Belgann knáa.

Næsti leikur gegn Shrewsbury og finnst mér líklegt að eitthvað verði um róteringar í þeim leik.

Maður leiksins: Gervinho

Arkitektarnir að fyrsta markinu. 

Arsenal ósannfærandi í fyrsta sigrinum

Það hefur margt gengið á í herbúðum Arsenal eftir tapið stóra gegn Utd. seint í síðasta mánuði. Loksins voru fengnir til liðsins menn með reynslu og nokkra landsleiki á bakinu í þokkabót. Af þeim fimm leikmönnum sem komu fyrir lok gluggans voru tveir í byrjunarliði, þeir Mikel Arteta og Per Mertesacker og var Nallarinn orðinn vel spenntur fyrir leik.

Nallarinn sá fyrir sér öruggan 4-0 sigur en annað kom á daginn. Eftir nokkuð góða byrjun á leiknum tóku taugarnar völdin og Swansea menn komu sér í nokkur ákjósanleg færi. Besta færi Swansea í fyrri hálfleik var skot Danny Graham sem Szczesny varði frábærlega. Arsenal átti sín færi einnig, Mikel Arteta sýndi strax á fyrstu mínútu að hann er verðugur arftaki Fabregas þegar hann bjó til dauðafæri fyrir Aaron Ramsey sem brenndi vel af. Skaphundurinn Theo Walcott átti svo pot sem var á leið í markið en varnarmaður Swansea sá til þess að staðan héldist óbreytt með árangursríkum björgunarleiðangri.

Allt stefndi í markalausan fyrri hálfleik en Michael Vorm, markvörður Swansea, var ekki á því að láta það gerast. Walcott átti þá skot fyrir utan teig sem fór í varnarmann og allt stefndi í hornspyrnu. Vorm brást fljótur við og náði að handsama boltann áður en hann færi útaf. Honum lá ansi mikið á að koma boltanum aftur í leik og renndi boltanum í átt að Ángel Rangel sem snéri bakinu í hann. Það heppnaðist ekki betur en svo að boltinn hitti beint í hælinn á Rangel og kastaðist því aftur til baka. Arshavin var fljótur að átta sig (eins og svo margir í þessum leik) og skaut strax að marki og skoraði. Virkilega vel gert hjá litla-stóra Rússanum og ekkert sjálfgefið að skora úr færinu sem hann var í. Staðan því 1-0 í hálfleik.

Seinni hálfleikurinn fór fjörlega af stað en þá var Scott Sinclair næstum búinn að jafna leikinn með hörkuskoti í ofanverða slánna. Nokkrum mínútum síðar setti v. Persie boltann í tréverkið hinum megin á vellinum eftir glimrandi takta fyrir utan teiginn. Maroune Chamakh átti svo síðasta færi leiksins en þá kom Kieran Gibbs með drauma sendingu sem rataði beint á kollinn á Chamakh en því miður fór boltinn beint á Vorm. Chamakh heldur því áfram markaþurrð sinni fyrir Arsenal.

1-0 sigur staðreynd og nokkuð ljóst að sjálfstraustið er ekki í botni þessa dagana. Góðu fréttirnar eru hinsvegar þær að loksins er kominn maður í þetta lið sem bindur saman vörnina og sóknina með faglegum snertingum og enn betri sendingum. Ég er að sjálfsögðu að tala um Mikel Arteta sem virðist vera skapaður fyrir þetta Arsenal lið og nokkuð ljóst að Arsenal er í góðum málum nái hann að halda sér heilum.

Per Mertesacker þarfnast hinsvegar aðlögunar enda ekki vanur svona hraða og hörku. Nái hann að aðlagast vel og spila eins og hann hefur gert með landsliðinu þá hafa Arsenal tryggt sér varnarmann í heimsklassa.

Næsta verkefni er erfiður útileikur í Meistaradeildinni gegn Borussia Dortmund á þriðjudaginn og þá bjóðum við velkomna svörtu sauðina, Gervinho og Alex Song sem munu styrkja liðið án efa.

Maður leiksins: Mikel Arteta

Andvökunætur framundan í herbúðum Arsenal

Það eru líklega margir stuðningsmenn Arsenal sem vildu óska þess að hafa fæðst blindir eftir hrollvekjuna sem fram fór í dag á Old Trafford leikvanginum.

Besti leikmaður tímabilsins hingað til, Thomas Vermaelen var ekki með vegna meiðsla sem hann hlaut líklega í leiknum gegn Udinese og sömuleiðis var Bacary Sagna fjarverandi vegna veikinda. Wenger þurfti því að ná í nokkra leikmenn úr varaliðinu til þess að fylla uppí afar þunnskipaðan leikmannahóp sinn og var því efnt til heljarinnar grillveislu í dag á Old Trafford.

Meðalaldurinn á bekknum var 21 ár en þar voru menn á borð við Gilles Sunu og maðurinn með þjála nafnið Oguzhan Ozyakub en hvorugir komu þó inná. Frakkinn ungi Francis Coquelin byrjaði sinn fyrsta leik í deildinni og spilaði í hlutverki varnarsinnaðs miðjumanns í staðinn fyrir blökkumennina blóðheitu Alex Song og Emmanuel Frimpong. Annars var liðið hefðbundið.

Það væri of tímafrekt að ræða leikinn í heild sinni og rifja upp öll mörkin sem við höfum allir séð nógu oft. Í staðinn ætla ég að koma með nokkra punkta hvernig að klúðra málunum gjörsamlega gegn rauðu djöflunum. 

Svona á að tapa 8-2 fyrir United.

• Slepptu því að styrkja liðið.
• Tryggðu þér lélegustu sjúkraþjálfarana á Englandi.
• Láttu Djourou og Koscielny spila saman í vörninni.
• Ekki kaupa mann í staðinn fyrir Clichy. Treystu frekar á hinn símeidda Gibbs.
• Nú ef hann meiðist, notaðu þá Traore.
• Seldu Eboue og fáðu til þín algjörlega óreyndan hægri bakstoppara.
• Ekki kenna Szczesny að stilla upp vegg.
• Leyfðu Frimpong að klára leikinn gegn Liverpool svo hann verði nú örugglega í banni gegn Utd.
• Segðu við Rosicky um leið og hann kemur til Arsenal: Hér skjótum við ekki fyrir utan teig, við reynum að spila boltanum inní markið.
• Pressaðu þannig á Ashley Young að hann fari á betri löppina.
• Ekki jafna leikinn úr vítaspyrnu. Gefðu frekar boltann á De Gea.
• Höldum uppteknum hætti og látum reka einn leikmann útaf í hverjum leik.
• Haltu hálfleiksræður þínar á frönsku.
• Og svo mætti lengi telja... 

Næstu þrír sólarhringar verða gríðarlega mikilvægir uppá framhaldið því að liðið þarf á styrkingu að halda. Liðið er veikara en á sama tíma í fyrra þar sem að ekki er búið að finna staðgengil fyrir Fabregas og enn vantar öruggan miðvörð með réttu líkamsbygginguna. Mér líst vel á að fá Gary Cahill og einnig Park Chu-Young frá S-Kóreu og vonandi detta þeir inn á næstu dögum.

Nallarar hafa sjaldan séð það svartara en þá er einmitt um að gera að styðja liðið sitt enn frekar.

(Skársti) Maður leiksins: Theo Walcott

Þetta væri fögur sjón að mati Nallarans í næsta leik gegn Swansea.

Ósigur gegn rauða hernum á Emirates

Mikið hefur gengið á í herbúðum Arsenal síðustu daga. Menn hafa farið frá félaginu, aðrir hafa farið í leikbönn og enn aðrir eru meiddir. Það hefur því líklega verið pínu hausverkur hjá Wenger og félögum hvernig ætti að stilla upp liði dagsins. Það var svo sem ágætlega gert, Carl Jenkinson fékk tækifærið og byrjaði í hægri bakverði á meðan Bacary Sagna færði sig yfir á þann vinstri. Nautakjötið frá Ghana fékk svo að byrja í stöðu varnarsinnaðs miðjumanns þar sem að Song tók út bann.

Frimpong var ekki lengi að næla sér í gult spjald og má skrifa reynsluleysi á það spjald. Hann hélt þá að Arsenal ætti innkast og tafði þar af leiðandi leikinn og fékk gult spjald fyrir vikið. 10 mínútum síðar fékk Koscielny í bakið og var skipt útaf fyrir hinn unga Ignasi Miquel sem var þarna að þreyta frumraun sína í deildinni.

Maður varð nokkuð svartsýnn á framhaldið enda þrír óreyndir leikmenn í liði Arsenal á móti nokkuð sterku liði Liverpool. Það var hinsvegar ekki hægt að kvarta yfir unglingunum heldur fór pirringurinn yfir á miðjuna þar sem að menn eins og Ramsey, Arshavin og Walcott áttu afar dapran leik. Samir Nasri var óvænt í byrjunarliði enda ennþá á launaskrá félagsins og því um að gera að nota kauða. Hann sýndi oft á tíðum lipra takta og væri það óskandi ef hann tæki eitt tímabil til viðbótar. Annars var það Emmanuel nokkur Frimpong sem var allt í öllu á miðjunni fyrir Arsenal. Tæklingar, sendingar og almenn viðvera var eitthvað sem kætti stuðningsmenn Arsenal á annars döprum degi.

Liðin skiptu völdunum á milli sín í fyrri hálfleiknum og þurfti Szczesny að taka á honum stóra sínum í eitt skiptið þegar Andy Carroll skallaði að marki. Frimpong átti svo gott hlaup sem endaði með skoti en Pepe Reina varði í horn. Lítið fleira markvert gerðist í fyrri hálfleiknum.

Martin Kelly dúndraði í utanverða stöngina í síðari hálfleik áður en Frimpong og félagar tóku völdin á miðjunni. Arsenal-menn voru búnir að finna taktinn þegar það óhjákvæmilega gerðist, Frimpong fór klaufalega í tæklingu og uppskar sitt annað gula spjald en fram að því hafði hann verið einn besti maður vallarins að mati Nallarans. Eftir þetta var róðurinn þungur fyrir Arsenal enda akkeri miðjunnar farið í ískalda sturtu.

Strax eftir þetta var þeim Andy Carroll og Dirk Kuyt kippt af velli og kynntir voru til leiks Luis Suárez og Raul Meireles sem áttu eftir að klára leikinn fyrir Liverpool menn. Fyrra markið átti þó aldrei að standa en þá var Suárez fyrir innan þegar sendingin kom og hafði þar af leiðandi áhrif á vörn Arsenal sem reyndi að hreinsa boltann frá marki en settu hann í staðinn yfir marklínuna. Virkilega svekkjandi sérstaklega í ljósi þess að ekki var hægt að kvarta yfir vörn Arsenal fram að þessu.

Liverpool héldu svo restina út og ekki einu sinni kóngurinn frá Danaveldi gat ógnað marki rauða hersins eftir þetta. Þess í stað bætti Suárez við löglegu marki eftir að Liverpool hafði sundrað vörn Arsenal og því gat maður kyngt þessu tapi betur en ella.

Eftir að lokaflautið gall púuðu stuðningsmenn Arsenal gríðarlega á Arsene Wenger og það þykir deginum ljósara að pressan eykst með hverjum deginum sem líður á franska hagfræðingnum. Hann hefur nú 11 daga til þess að bæta við sig mönnum og það er eins gott að hann geri það því að annars erum við að tala um baráttu um 6. sæti í lok leiktíðar.

Maður leiksins: Thomas Vermaelen  

Líklegt er að Wenger gangi með þessa á næstu dögum.