Bitlausir framherjar orsökin að óverðskulduðu tapi

Manchester City kíkti í heimsókn á Emirates völlinn í gærkvöldi í deildarbikarnum. Þrátt fyrir að Mancini segðist stilla upp varaliði tefldi hann fram rándýru liði með þekktum manni í hverri einustu stöðu, kannski fyrir utan markmanninn. Arsene Wenger hinsvegar hefur úr aðeins þunnskipaðri hóp að moða og því áhugaverð viðureign í meira lagi.

Arsenal var betri aðilinn lungan af leiknum, á því liggur enginn vafi. Gríslingarnir þrír, Chamberlain, Frimpong og Coquelin stóðu sig gríðarlega vel á miðjunni hjá Arsenal og mega menn eins og Nigel de Jong og Owen Hargreaves muna fífil sinn fegurri eftir frammistöðu sína í gær. Squillaci átti óvenju góðan leik þrátt fyrir að þurfa að díla við menn eins og Dzeko og Aguero.

Það er þó einn vandi sem enn er ekki leystur hjá Arsenal og það er framherjastaðan. Vissulega höfum við hinn sjóðheita Robin van Persie en við vitum það vel að hann spilar ekki alla leiki. Þess vegna þarf að hafa góða menn til taks skyldi Persie meiðast einn daginn. Þá er ekki að finna þessa dagana. Chamakh hefur aldrei náð þeim væntingum sem til hans voru gerðar og Park Chu Young þarfnast aðlögunar. Þetta er mikið áhyggjuefni fyrir Arsenal sem hreinlega verður að styrkja þessa stöðu í janúar ef ekki á að fara illa.

Sóknarparið sýndi engin gæði fram á við í gær og mega líta upp til miklu yngri manns, Alex Chamberlain, sem var frískasti sóknarleikmaður Arsenal í gær og áttu varnarmenn City í miklum erfiðleikum með kauða. Hann hefði skorað stórglæsilegt mark en Pantilimon, sem átti skínandi leik, varði meistaralega frá honum.

Eftir að Arsenal hafði stjórnað leiknum allan seinni hálfleikinn skoraði City með skyndisókn eftir hornspyrnu hjá skyttunum. Virkilega sorglegt og óverðskuldað mark sem kostaði Arsenal leikinn. Að vísu fékk Chamakh dauðafæri í lokin en hann skortir alla greddu fyrir framan markið þessa dagana og spurning um að selja manninn aftur til Frakklands eftir áramót.

Þrátt fyrir tap geta leikmenn Arsenal (fyrir utan Park og Chamakh) gengið stoltir frá leiknum enda létu þeir rándýrt lið Manchester City líta illa út!

Það var svo greint frá því í fjölmiðlum að þeim Frimpong og Nasri hefði lent saman í göngunum eftir leik en Frimpong hefur verið málglaður í garð Nasri eftir að sá franski yfirgaf herbúðir Arsenal. Nasri á að hafa trompast er Frimpong afhenti honum nærbol sem á stóð "bench" en Nallarinn selur þá sögu ekki dýrari en hann keypti hana. Ekki kom til handalögmála þó en Nasri á að hafa blótað svakalega á frönsku sem varð til þess að miklar blæðingar hófust í eyrum Wengers.

Þar með hefur Frimpong tryggt sér nafnið sitt aftan á varatreyjuna sem Nallarinn ætlar að versla sér er hann fer á leik Arsenal og Everton nú í desember. 

Næsti leikur verður háður á heimavelli Wigan næstkomandi laugardag og geri ég algjöra kröfu á þrjú stig í þeim leik! 

Maður leiksins: Emmanuel Frimpong (fyrir magnað hugarfar sitt á vellinum)

 
Arsenal hefur eignast sinn Balotelli.